قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ ۇيىمداستىرۋىمەن وبلىستىق قوعامدىق كەڭەستەر مۇشەلەرىنىڭ ءبىرىنشى سەزى بولىپ ءوتتى. جيىنعا قوعامدىق كەڭەستەردىڭ توراعالارى مەن مۇشەلەرى, ءماسليحات دەپۋتاتتارى, مەملەكەتتىك قىزمەت ارداگەرلەرى, قوعامدىق جانە ەتنومادەني بىرلەستىكتەردىڭ, بۇقارالىق اقپارات قۇرالدارىنىڭ وكىلدەرى كەڭ كولەمدە قاتىستى.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى, ادەپ جونىندەگى كەڭەسىنىڭ ءتورايىمى ن. جاننازاروۆانىڭ ايتۋىنشا, سەزد ماقساتى – مەملەكەتتىك ورگانداردىڭ اشىقتىعىن قامتاماسىز ەتۋدە, سىبايلاس جەمقورلىققا قارسى «نولدىك توزىمدىلىكتى» قالىپتاستىرۋدا قوعامدىق كەڭەستەردىڭ الەۋەتىن كەڭ كولەمدە پايدالانۋ ماسەلەلەرىن تالقىلاۋ.
اگەنتتىكتىڭ اۋماقتىق دەپارتامەنتى تاراپىنان ءتۇرلى ەڭبەك ۇجىمدارىندا, وقۋ ورىندارىندا, الەۋمەتتىك قورعاۋ سالاسىندا, قۇقىق قورعاۋ ورگاندارىندا, قىزمەت كورسەتۋ ورتالىقتارىندا, كاسىپكەرلەر, باسقا دا ماقساتتى توپتار اراسىندا زاماناۋي سىبايلاس جەمقورلىققا قارسى زاڭناما تالاپتارىن ءتۇسىندىرۋ بويىنشا جۇمىستار جۇيەلى تۇردە جۇرگىزىلۋدە. قوعام وكىلدەرىنىڭ بەلسەندى اتسالىسۋىمەن اۋماقتىق دەپارتامەنت جانىنان سىبايلاس جەمقورلىققا قارسى موبيلدىك جانە ارنايى مونيتورينگ توپتارى قۇرىلىپ, جىلدىڭ باسىنان بەرى دەنساۋلىق ساقتاۋ, ارنايى ورتا ءبىلىم جانە تەمىر جول كولىگى سالاسىندا قوعامدىق مونيتورينگ جۇرگىزىلدى. تۇرعىندارعا ارىز-شاعىم ءتۇسىرۋدى قولجەتىمدى ەتۋ ماقساتىندا ارنايى 8707 170 1424 شۇعىل جەلىسى اشىلىپ, الەۋمەتتىك جەلىلەردەگى اككاۋنتتار اشىلدى.
اۋماقتىق دەپارتامەنت باسشىسىنىڭ ايتۋىنشا, قوعامدىق كەڭەستەردىڭ قۇرامىندا بەدەلدى, مەملەكەتتىك قىزمەت, قوعامدىق جۇمىس, ءوندىرىس سالاسىندا تاجىريبەلەرى بار قوعام قايراتكەرلەرى بار. سول سەبەپتەن, تۇرعىنداردىڭ سىبايلاس جەمقورلىققا قارسى ساناسىن كوتەرۋ جانە مەملەكەتتىك قىزمەتتىڭ وڭ ءيميدجىن قالىپتاستىرۋ ماقساتىندا, قوعامدىق كەڭەس مۇشەلەرى جانە ارداگەرلەرمەن بىرلەسىپ جۇمىس جاساۋ قاجەتتىگىن باسا ايتتى.
بۇدان باسقا, جۋىردا «قازاقستان تەمىر جولى» اق وبلىستىق بولىمشەسىندە ارنايى مونيتورينگ توبىمەن جۇرگىزىلگەن قوعامدىق باقىلاۋ جۇمىستارى تەمىرجول كولىگى سالاسىندا ءبىرشاما ماسەلەلەردىڭ بەتىن اشىپ بەردى. اسىرەسە جولسەرىكتەردىڭ بيلەتسىز جولاۋشىلاردى 25.000 تەڭگەگە دەيىن كولەمدەگى اقىعا پويىزعا وتىرعىزۋى, تەحنيكالىق قىزمەتكەرلەردىڭ جولاۋشىلار مەن جولسەرىكتەر اراسىندا بايلانىستىرۋشى دەلدال قىزمەتىن اتقارىپ جۇرگەندىگىن, ۆاگونداردىڭ ەلەمەنتارلىق سانيتارلىق-گيگيەنالىق جاعدايىنىڭ تومەندىگى قوعام وكىلدەرىنىڭ نازارىنا ىلىكتى. جالپى مونيتورينگ توبىنىڭ ماقساتى تەك قانا كەمشىلىكتەردى انىقتاۋ عانا ەمەس, سونىمەن بىرگە قوعامدىق سانانى قوزعاۋ ارقىلى ەڭ وزەكتى ءارى وتكىر دەگەن ماسەلەلەرگە بيلىكتىڭ نازارىن اۋدارۋ.
جيىن بارىسىندا قوزعالعان تاقىرىپتىڭ ءبىرى - الەۋمەتتىك جەلىلەردە قوعام بەلسەندىلەرى نەمەسە بلوگەرلەر تاراپىنان مەملەكەتتىك ورگاندارعا, اسىرەسە اۋدان, اۋىل اكىمدىكتەرىنە قاتىستى سىني پىكىرلەردىڭ كوپ جازىلۋى. اسىرەسە, اتالمىش تۇپقاراعان اۋدانىنا قاتىستى جۇرتشىلىقتى دۇرلىكتىرگەن سىني كوزقاراستاعى ماتەريالدار جەلىنى تولتىرۋدا. دەمەك, جەرگىلىكتى اكىمدىكتەر رەزونانس تۋدىرۋعا جول بەرمەي, تۇرعىنداردىڭ ارىز-شاعىمدارىنا دەر كەزىندە ءارى ساپالى جاۋابىن بەرىپ, ماسەلەلەرىن شەشۋگە بار كۇشىن سالۋلارى قاجەتتىگى ايتىلدى.
ماڭعىستاۋ وبلىستىق ءماسليحاتىنىڭ دەپۋتاتى ت.ءامىروۆ مۇنايلى اۋدانى بويىنشا سىبايلاس جەمقورلىقتىڭ الدىن-الۋ بويىنشا اتقارىلىپ جاتقان جۇمىستارعا توقتالدى.
ال قوعامدىق جانە ادەپ جونىندەگى كەڭەستەردىڭ مۇشەسى ق. ەرەجەپوۆ بولسا, ادەپ جونىندەگى كەڭەستە قارالاتىن ماسەلەلەردىڭ قوعامدىق كەڭەستىڭ قىزمەتىمەن بىرگە ۇشتاساتىنىن, مەملەكەتتىك قىزمەتشىلەردىڭ قۇقىقتارىنىڭ قورعالۋىنا ۇلكەن ءمان بەرىلگەندىگىن اتاپ ءوتتى.
ادەپ كەڭەسى جازالاۋشى ورگان ەمەس, كەرىسىنشە مەملەكەتتىك قىزمەتشىلەردىڭ تارتىبىنە باقىلاۋ جۇرگىزەدى, سونىڭ ىشىندە جاس مەملەكەتتىك قىزمەتشىلەردىڭ قۇقىعىن قورعاۋعا باعىتتالعان ۇيىم ەكەندىگىن ەسكە سالدى.
جيىندى قورىتىندىلاي كەلە, دەپارتامەنت باسشىسى ن. جاننازاروۆا قوعامدىق كەڭەس مۇشەلەرى, ارداگەر اعالار, اق جاۋلىقتى انالارمەن تۇراقتى تۇردە بەيرەسمي فورماتتا كەزدەسۋلەر وتكىزىپ, قوعامدا بولىپ جاتقان ءتۇرلى جايتتار, اسىرەسە سىبايلاس جەمقورلىققا قارسى ءىس-قيمىل, مەملەكەتتىك قىزمەتتىڭ وڭ ءيميدجىن قالىپتاستىرۋ, مەملەكەتتىك كورسەتىلەتىن قىزمەتتەردىڭ ساپاسىن كوتەرۋ, مەملەكەتتىك قىزمەتشىلەردىڭ ادەپ ەرەجەلەرىن ساقتاۋىنا قاتىستى ماسەلەلەردى تالقىلاپ, بىرلەسىپ ورتاق پىكىرگە كەلۋ قاجەت ەكەندىگىن ايتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى